洗車其實可以好好玩 - 自助洗車場

雖然話車是男人的第二個老婆, 但作為大婆的我其實都好錫車 (哈哈~~!!)

有好多屋苑的停車場都未必準許住戶於停車場內洗車, 有都只可能局限於打桶水來“輕洗”, 駁喉沖下呔鈴都會弄濕其他人的車, 可是光顧洗車店又怕會刮花。

之前經朋友推介, 發現元朗大旗嶺開了間自助洗車場, 提供場地及洗車工具供車主們自助洗車, 之前成班男人去洗過都話不錯, 於是趁放假跟老公去洗車玩下。

自助洗車場位於元朗雞地迴旋處附近, 也頗易找。佔地都幾大, 自助洗車場同時設有露天停車場, 隔離也有自助販賣機, 有飲品和車用品提供。 自助洗車大概有11、2個位, 當日是平日下午, 都有不少人前來洗車。

全自助型式, 先找一格泊好車, 然後跟步驟指示: 
先入錢, 收費$35/35分鐘, 只接受$10或$5的硬幣, 最好自行準備, 或可以到counter找續“唱錢”, 投入好硬幣後便開始計時。 按步驟使用: 高壓水槍、 泡沫槍、 氣風槍和吸塵功能。

先用高壓水槍噴濕車身, 力度都很大, 好多污跡都可以一拼沖走, 而且有提供踏級, 車頂都可以沖乾淨。 高壓水槍水力好夠, 這個步驟對比平時打桶水洗好玩好多。

然後用泡沫槍, 直接噴泡泡落車身, 因為想洗得乾淨點, 就用私伙厚海綿打圈, “卒”走頑固污跡, 因為泡泡都幾快消失, 所以額外噴泡泡到桶仔度, 一路“卒”一路加泡, 然後再用高壓水槍過水。

“卒”泡泡時候, 老公就用低壓水槍加膠擦去洗鈴。

過完水就用私伙吸水布抹走車身水漬。 再用氣風槍, 噴走窗邊、 指揮燈位水珠, 力度又是很大, 平常洗車沒有這工具, 所以覺得好用又好玩。原來尾箱門蓋超污糟, 用氣風槍噴了不少污跡出來呢! (又要過多次水, 下次噴泡泡之前先要清潔尾箱門蓋啊!)

最後5分鐘吸塵, 不過吸力不太強, 勉強吸到地毯上部份碎石及垃圾, 不過好過無。

35分鐘完結之前再入錢其後就$1/1分鐘, 如果完了才入錢就要由頭計過。洗完車乾淨晒~(哈~!)

用後感:
- 35分鐘洗車其實有點趕, 合二人之力才完成洗車、 洗鈴、 吸塵的步驟, 如果只是洗車就夠時間用的。
- 工具都算幾齊, 簡單方便又易用, 女仔自己來洗車都無難度。
- 自助洗車場24小時營業, 半夜抽起條筋想洗車都可以過來。
- 比人洗車有時可能會刮花又或者洗得“求其”, 自己洗車可以洗得乾淨又徹底。始終愛車之人, 會享受洗車樂趣!