南紀白濱位於和歌山既南面,係日本3大古溫泉之一! 之前提過日本司機有2種，一係踩住去，一係龜速，去白濱路程中有好多路都係得單線行車，遇上後者的話，車程就要耐d了！開車由大阪市去，沿途唔係遇到太多後者，差不多2小時就到。
穿過好多隧道, 跨過好多山谷，沿途風景很美，加上天朗氣清，更加有郊遊feel!.
停車場非常大！而且無料的，泊幾耐都得！
tore tore市場有游水海鮮，又有冰凍海產，又有乾貨手信同生果，室內有個美食廣場，室外仲有個BBQ場，可以擰岩岩買左既海鮮出去即燒即食，只要買個時同店員講聲for BBQ，佢地就會免費幫忙處理。
因為店員整理海產需時，而且頗多本地人同旅行團黎呢度，建議先㨂好海鮮，等擰既時候就可以去買下生果同手信。雖然市場面積不是太大，但都足以行個多兩個小時。
好大條吞拿魚,好大個頭呀!!!
呢個時間和歌山盛產蜜柑, 有好多由蜜柑製成的產品, 果汁,果醬,啫喱同餅, 樣樣都好好味咁!
士多啤利又平又大粒,而且好香, 買番盒浸完溫泉食先!
6隻扇貝都係1000yen!
刺生都好平，Toro更加唔駛講，唔駛hk$100就有交易，一於豁出去食大toro加中toro!!放縱地加埋隻大鮑魚！買完擰出去燒！
BBQ 場要收費，300yen一個，提供爐及一set 餐具，而且唔可以帶飲品入去，一定要買佢d飲品！
大toro果然係大toro,入口即溶，好味到不得之了！香港的簡直冇得比！
中toro口感好好，比起香港壽司店的極上toro還要好味，魚脂比例剛好！
比起黑門巿場選擇多好多，又新鮮而且又平，果然冇黎錯！推介！！飽肚之後出發去溫泉酒店！
途中遇上貓星人,好似米高XD
之前朋友介紹話有間溫泉酒店係對住無敵太平洋大海景歎住浸，而且好靚好舒服，經過一輪research後揾到：白濱海舟溫泉酒店，好受日本本土人歡迎，仲要係之前係箱根浸過好ok個間溫泉酒店同一集團，有心信保證！
溫泉酒店外觀
經過小花園進入lobby
我地特登㨂weekday去諗住冇咁多人，浸大浴場都冇咁尷尬！全酒店都是以modern日式設計，淺米色的簡約之中帶深木色的detail,環境好舒服! 地台都鋪上塌塌米，一進入酒店就要除鞋，有專人幫忙收好！赤脚遊走酒店同搭lift, 感覺好好玩！
由reception望出去已經見到太平洋了!
係reception登記好後，就到後面浴衣區㨂浴衣！酒店既浴衣好靚，由其是係for女仔的，花多眼亂，件件都好靚，件件都想著！
我地安排住'波之抄'個邊。
經過長長的走廊搭lift上樓上.
一開房門，先有小小的和式玄關位，然後經過衛生間(日本人認為坐廁是污糟的，所以要獨立一個空間，同淋浴房分開)
趟門衣櫃連小小的pantry位，隔離是全木製的淋浴間，穿過淋浴間的玻璃門就可到達半露天的木製風呂，因為對住樹林同大海，所以好放心係露台浸浴唔怕會有人見到！
接著是約大的客廳，落地玻璃窗望住出面既樹林同大海非常寧靜舒服，好relax!
客廳隔離就係睡房，沒有間格和門，空間感很寬敞，因為係和式設計，所以冇床，而床褥就放在木地板上。床褥被鋪都好柔軟舒服，而且很大，打横訓都得！相比起香港既窩居，一時感觸！
下午4點幾，呢個時段應該好小人去大浴場浸，所以快快換上浴衣落去。
先經過休息區，浸完溫泉可以係度休息下飲下水食下雪條。隔離係淋浴區，浸溫泉前日本人要會清潔好身體先落水的。 除左露天大浴場，還有3個獨立的私人風呂，如果見有鎖匙掛係休息區即代表冇人浸該溫泉，就可以擰該條鎖匙入去浸。
雖然有著浴衣，始終男女共浴對香港人黎講比較尷尬，幸好呢個時間只有幾個日本人係度浸！望住無敵太平洋海景，天氣又好，聽住海浪聲浸溫泉真係爽，好relax!真係冇黎錯，貴d都值！
因為有人浸緊, 所以只可以係側邊影下個無敵太平洋景!
浸完大浴場返上休息區飲下水食番支雪條，見有私人風呂條鎖匙，一於浸多轉！
私人風呂私隱度好高，唔怕有其他人打擾，同情人望住大海聽住海浪聲浸，特別浪漫呢！
沒有留言:
張貼留言