2015 大阪+京都+白濱 - Day 2

去到大阪除左食食食同買買買，作為一個designer, 當然要去潮聖大師級既作品！安藤忠雄先生-呢位國寶級既建築師係關西有好多作品，而今次我㨂左去茨木市春日丘教會 - '光之教堂' 潮聖！出發前揾資料， 香港好小旅遊網同blogger 分享呢方面既行程，反而台灣背包客不論交通，位置， 注意事項都講得好詳盡。 

潮聖前，當然要醫左個五臟廟先。因為要係梅田站搭阪急線去茨木市， 所以係車站附近揾野食，係日本是但一間食店d野食都好味，有時仲會有驚喜，唔會有雷品， 絕對放心！

間拉麵店位於車站同大丸之間既横巷入面，門面相當唔起眼， 但見入面好多日本人食緊， 實冇問題啦， 於是入去幫親！

       

濃濃的醬油湯底，配上軟林林燒肉！ 

食完就出發，由阪急線梅田站搭特急去茨木，大概需要半小時 (係日本搭車要㨂特急，急行呢d,  可以skip 好多站，如果唔係站站停，有排搭).

去到茨木站，出面有個巴士站，有架循環線巴士去教堂，開頭都有小小難揾，因為冇乜指示， 巴士司機見我地個樣迷迷茫，加上去得茨木市既遊客多數都係去參觀'光之教堂',就主動上前問我係咪去Ando San教堂，並教我地坐邊架車，仲有幾耐有車， 雖然言語不太通(佢地用好簡單既英文對答) ， 但佢地都好主動幫忙，好窩心！去到'春日丘公園'站落車， 雖然有指示牌指示教堂位置，但都唔算太清楚， 呢刻有個日本伯伯好主動上前教我地點行過去，關西人真係熱情好客呢！

教堂位於寧靜的住宅區內，外牆用上安藤先生喜用的招牌物料混凝土，只掛上一個細細的十字架及一個用清玻璃做的十字架， 非常簡潔modern,睇唔出係教堂，但又同周圍環境出奇地配合。 

內庭亦是用混凝土所建，create 左各方面空間感既平衡！ 

 

先走到reception登記，教堂係私人團體唔係日日都對外開放，出發前需要係佢地個website查看開放的日子及時間(以免摸門釘) ，再send email 比教會，通知人家會什麼時候來， 到來後要比獻金， 以為持教堂運作及維修。 但眼見好多人冇預約就前來影相觀光， 雖然教會職員都好有禮貌地比佢地參觀， 但始終都係人家地方， 要遵守下人家規則吧！ (呢個係教會的website:http://ibaraki-kasugaoka-church.jp/j-top.html) (可以check到開放時間, 同send email 預約)

教堂分有兩個崇拜堂： 一個室內慣切混凝土牆身，2層高的樓底，配用木地板，木長椅，以及用2枝樹枝簡單併湊出的十字架，非常簡約，冷酷中帶點溫暖

 

而另一個崇拜堂， 一入到去即被整個環境震懾， 若高的混凝土牆， 昏暗的燈光， 深木色地板及深木色長椅，造就由清玻璃將室外的自然光引進室內所形成的光之十字架，雖然本身冇宗教信仰，但個一刻心境豁達肅然，加上現場有位日本女士彈奏著風琴，環境氣氛都將心靈洗滌！心中亦不禁慨嘆這位建築師的功架！

心靈洗滌後，就到銀包出血！返到梅田，當然要去大丸tomica捐獻。買就要買特別版既車，因為價錢比春園街平，款又多d㨂，今期做緊鍍金系列，有點兒大陸風，吸引度大減！但都有4架進帳

 

大丸最低個層好多賣野食既counter,  甜品，炸物，手信，款式多賣相又吸引， 食指大動，晚飯前可以醫下口痕!

天婦羅魷魚， 炸漿比例剛好， 新鮮炸起，好味！

綠茶紅豆士多啤梨大福， 紅豆餡好多， 甜度又恰到好處

紅豆豆沙包， 豆沙包d餡湧出黎咁濟

當中有檔賣牛奶妹甜品，亦有賣佢既人形公仔，朋友好鐘意牛奶妹，而且價錢比香港水貨店還要平， 所以幫佢掃左唔小貨仔

適逢3月14日，日本的white day,  男生要回禮比女生， 百貨公司甜品counter相應出左唔少product

而window display 都做得好靚， 好佩服日本人的一絲不拘

晚餐食大阪名物-大阪燒， 之前食過道頓堀入面的'千房'非常好吃，讚不絕口，今次到梅田的分店。呢間分店唔太大，抽風系統不是做得太好，比較多油煙。我地每人一個大阪燒，師傅先將材料層層疊，煎到某個程度後，就放在自己面前的鐵板keep 住熱度， 雖然同一集團，但醬汁味道，粉漿比例竟然有差別，道頓堀的分店味道好好多，令人再三回味的，今次呢間真的比下去，亦浪費了今次的quota，所以決定聽晚再去道頓堀的！

 

啤酒配大阪燒一絕！
反而小食比大阪燒來得出色，煎玉子同煎薯仔都好味！