經歷了來回地獄又折返人間的96小時 - 包包出世啦!!

2018年1月3日，對好多人來說可能是好平常的一日，但對於我來說，簡直是經歷了來回地獄又折返人間的96小時 - 懷胎9個多月，終於要卸貨，包包提早搶閘，於這一天出世了！

趁記憶仍猶新，還是快快寫下那刻骨銘心的過程，因為聽聞聞得笑氣多會無記性呢(哈哈~~!!)

1月2日

0635 訓訓下被輕微陣痛痛醒，起初以為係肚痛，之後好似m前的冤痛感覺，但又唔係痛好耐，陰d陰d咁，心諗: 咁快？唔會掛？比預產期早了11日呢！又冇見紅同穿水，因為太眼訓，同自己講應該唔係既，於是忍住痛繼續訓，同時開住個app 記錄住陣痛既時間跟次數

0800 照原定產檢安排到屯門醫院A7做甲狀腺檢查，因為需要入院才可做檢查，於大堂登記後便直接到A7產前房，因為有肚痛，姑娘初步檢查後話1度都未開叫我放心，之後換上粉紅色袍，駁機check bb 心跳，然後等醫生巡房。

1000 醫生巡房，內科醫生睇完之前抽血報告話甲亢指數唔太大問題，影響唔大，可以返屋企休息，心諗可以返屋企抖抖，不過產科醫生話因為有肚痛情況，而且入院後at least要24小時後先可以出院，建議留一晚做觀察，原以為做下檢查冇預計要留院，淨係帶左簡單用品，走佬袋都冇帶，唯有叫老公收工擰埋比我，所以緊記入得醫院，無論什麼原因和情況，都要帶埋走佬袋啊！

1300 - 1800 lunch過後陣痛開始頻密，訓下醒下的狀態下捱到晚飯時間，幸好安排於窗邊位，有風景望下。

1800 - 2000 因為老公知我食唔慣醫院的饍食，於是晚餐買外賣比我，晚飯之後陣痛更頻密，食完飯同老公出走廊來來回回散步，諗住分散下注意力。

2100 - 0000 產前大房日頭個個係度訓，好似好平靜，點知夜晚尤其半夜開始，好似變左煉獄咁，個個係度嗌救命嗌好痛，有人痛到喊，有人狂禁鐘仔叫姑娘，因為拉起布簾見唔到咩事，加上11點後會熄燈，齋聽其實都幾驚嚇下，唔驚都搞到好緊張，想訓一陣都好難！

1月3日

0000 刷完牙去完廁所諗住訓，點知....見紅，個下真係好驚，驚到唔知點算好，死啦，係咪生得啦？即刻衝出去同姑娘講見紅，可能佢日日都見慣，竟然好冷靜咁同我講再留意下陣痛次數同時間，我唯有忍住痛爬番埋床，想沖個涼都痛到沖啊唔到。之後陣痛開始勁密，痛到爆痛到想死，訓又唔得、坐又唔得，而且開始有便意，原來生仔前真係會急屎屎的，要勁深呼吸來減輕痛楚和保持冷靜，於是起身係A7房內周圍行下同做深蹲，不過臨尾真係痛到就死，冷汗都標埋，基本上係用意志去支持住。

0100 痛到真係忍唔住叫姑娘，姑娘伸手check 宮頸打開度數既情況，話仲未得，我心諗唔係嘛，已經痛到標晒眼水都仲未生得，不停wtsapp 老公話好痛，佢都好緊張，問係咪生得啦？係咪要出門口過黎入產房啦？

0230 - 0330 痛到就黎顛，姑娘再檢查話宮頸話開到4度，叫我執定野，我痛到要超慢動作黎執，然後姐姐黎幫手，除衫換上紫袍轉床準備推去產房，即刻打比老公叫佢黎standby。由A7推出走廊去產房時，見到老公係外面，個下我好想喊，因為真係好驚同好痛，推床入到產房原來入面勁凍，個人勁打冷震，姐姐幫我鎖好行裝入locker之後轉床，可能產房人手唔夠，自己一個係產房等左一陣先有人理我，勁痛勁想痾，勁典黎典去，好出力咁死捉住床邊個扶手，間期更3次要求聞笑氣，原來笑氣都幾臭，尤其個膠吸嘴，第一下聞其實臭到有d想嘔，但唔聞又頂唔順，個下我局住選擇了臭。雖然聞住笑氣，但都痛到好似驅魔人咁喪嗌，如果老公係出面聽到既話，肯定以為拍緊驚慄鬼片！助產士叫要忍住唔好痾，唔好晒氣晒力嗌，不過大大啖cher笑氣，好似啪左野咁，有意識但個人high high 地但手腳又唔聽駛咁，控制唔到自己。

幾經辛苦宮頸終於開到8度，助產士比電話我打比老公叫佢入黎陪產，個下痛到一個點，電話又用膠袋包住好難禁，手又震，眼又朦，個下好驚打錯no. 。老公入到黎，見到佢雖然個心定d，但佢淨係識講加油、頂住、就得，講得好輕鬆咁，但我覺得佢講到好煩想打鑊佢，心諗生仔咁辛苦，如果第二時對唔住我地兩母女，我一定打到你飛起！

去到最後直路，發覺自己開始唔夠力痾，助產士不斷話唔發力bb就會窒息，個下超驚，連呼吸都亂埋，個腦諗埋好多無謂野: 唔可以比包包有事！ 唔想食全餐啊！我會唔會痛死架？會唔會難產架？可唔可以吸佢出黎？生完呢個以後都唔生啦！真係唔夠力時，助產士剪左會陰4刀，個下已經痛到顛左所以唔太覺，最後出盡全力一痾，聽到bb 喊聲，終於…都卸貨了！

0539 包包出世了！

助產士剪臍帶、抹身後，抱包包埋身比我地影相，期間不斷提我問我bb 出世時間。係肚入面住左9個多月的小傢伙，第一眼見到覺得佢好細粒，出世時只有2.45kg，抱上手好輕喔，而且已張開眼仔，臉龐白雪雪的，好可愛！以為第一眼見到包包會好激動，會忍唔住喊，睇戲睇劇的生仔一刻都係會感動落淚，但原來真實到自己經歷時，除了痛和攰想講粗口外，原來那一刻並非想像般感動，反而是舒一口氣，終於痛完了捱過了，難怪古時生仔真係搵命搏！不過抱住包包時感覺始終係好sweet既！

呢個時間老公係側邊影相，但自己成身汗，頭髮又亂晒成個顛婆咁，又痛又攰又素顏好唔想影相，但係又唔想錯過呢一刻，唯有強顏歡笑；同一時間助產士係大脾打針，磋胎盤出黎，並開始縫會陰，大概縫左45分鐘，雖然痛但相比陣痛和生那刻已經不算一回事。最後比左杯水、 一包奶和餅乾我，但實在太攰只飲了幾啖水就推左上產後房。

政府醫院推行母乳餵哺，唔理你有奶冇奶都要你自己埋身餵，接下來的三日都是困獸鬥。頭一兩日真係上唔到奶，院方又唔肯比奶粉，點都要你餵到為止，加上傷口痛到爆，抱起包包上床落床都好似撕裂感覺，望住嚎哭的包包好無助，自己坐係張床度喊埋一份，好想叫老公擰罐奶粉黎開比包包。最後因為包包20個鐘冇VV，有缺水情況出現，所以先比左次奶粉佢食………搞到日日期望同包包出院，趕快返屋企！

天昏地暗咁過左3日，終於可以出院了！

由差不多二十個鐘頭的陣痛，到最後衝刺呼天搶地失去理智的一刻，到成為父母的一秒，回想全都是電光火石之間的事，所有的痛楚仍歷歷在目，但後來發現原來陣痛和生產過程並不是最痛最辛苦，而是之後對BB的照顧 - 餵奶換片掃風氹訓覺，剛放下床以為有得訓轉頭又要起身，仲未數嘔奶同爆片，每晚無限loop住上演，仲要1月遇上寒流侵港，晚上氣溫只有幾度，半夜三更不情不願離開被窩，每日加埋訓唔夠6個鐘，時間完全地顛倒、付出及犧牲，頭一個月簡直辛苦到想喊。有時辛苦到情緒近乎崩潰失控，小小事就控制唔到眼淚兼燥底，脾氣更一發不可收拾，連溫馴的老公情緒也出現崩潰，產後抑鬱不止媽媽會有，連爸爸可能都會出現呢，所以家人朋友真係要體諒和支持一下。

雖然爸媽真的唔易做，餵人奶的路更是難行，甚至時間和心血要全奉獻，不過見到包包可愛的臉蛋和每個令人心都甜埋的笑容，辛苦的感覺都忘卻了，完全是推動撐下去的動力啊！