2015 大阪+京都+白濱 - 租車篇

之前已經想自己揸車遊日本，體驗下係日本既駕駛樂，而且唔駛趕火車趕巴士schedule，最緊要係點到點，唔駛行樓梯上上落落，好方便!岩晒我地呢d懶人！

出發前，先係'tocoo'租左車(www2.tocoo.jp/cn) . 先㨂取車還車日期同時間，由00:00到23:30既時間都有得㨂，不過要睇下取車分店既opening hour ，一般最早7am有得擰，最遲9pm 還車。  之後就㨂取車地點。全國有好多取車地點，包括係機場，有人一落機就即刻取車出發！而我地就㨂左係肥後橋酒店附近間分店取車。而還車可以㨂唔同地點，不過要加錢。

去到重要既一環：㨂車！車款都頗多，由細cc車到跑車，7人車，貨van,電動車都有。原先我地諗住租1500cc Mazda3,因為揸開歐洲車，而新款既Mazda 又幾靚仔，所以想試揸下(不過租車個度係冇提供最新款既車款)話就話係可以㨂定車款，但到時取車未必會比㨂左個架你，有可能會係比同grade 車但唔同brand，要視乎當日既情況，而我地好好彩取車時，無料upgrade左做1800cc hybrid prius 比我地！

2015 大阪+京都+白濱 - Day 3

之前經過西梅田車站附近見到有露天function 搞， 咪過去湊下熱鬧。 原來係幾間拉麵店同小食店既pk賽，3日內睇下邊間既食品最多人幫襯. 每間拉麵店都派出自己最人氣最拿手的拉麵出來，同其他食店一較高低。一次過可以試幾間唔同款式既拉麵，鐘意食拉麵既我地又點會錯過呢!

所有拉麵均一價800yen一碗，先買張食卷，然後看圖㨂自己鐘意既拉麵款式，再到該攤檔排隊比飛擰麵，亦可多付100yen追加配料，如紫菜，筍，去到日本當然要追加佢地既流心'他媽哥'啦！(比香港追加一隻蛋十幾蚊還要平呢！) 開頭我地都十五十六，唔知食邊間好，見有2,3間特別多人排，咁實冇得輸啦，一於跟隊！(雖然全日文，冇英文，大多數都聽唔明佢地講乜， 好在body language係世界語言，加上熱情的關西人，唔明講到你明為止)

其中食既一間係牛肉拉麵，吉野家的牛肉配上牛骨湯底既拉麵，味道不錯但未至於好好味!

 

另一間食既係叉燒醬油湯底拉麵，見塊叉燒咁既色水以為佢未熟透，點知一放入口係即溶，好食到不得之了， 加上湯底係我地鐘意既醬油， 正!

 

食左兩碗拉麵已經7成飽， 但難得遇到呢d活動， 豁出去試埋小食， '鳥開'既炸雞粒+炸雞翼！ 炸漿同肉既比例剛好，唔會太多，而且炸完後肉質仍好juicy,  加上醬汁甜甜地幾好味!

 

 

2015 大阪+京都+白濱 - Day 2

去到大阪除左食食食同買買買，作為一個designer, 當然要去潮聖大師級既作品！安藤忠雄先生-呢位國寶級既建築師係關西有好多作品，而今次我㨂左去茨木市春日丘教會 - '光之教堂' 潮聖！出發前揾資料， 香港好小旅遊網同blogger 分享呢方面既行程，反而台灣背包客不論交通，位置， 注意事項都講得好詳盡。 

潮聖前，當然要醫左個五臟廟先。因為要係梅田站搭阪急線去茨木市， 所以係車站附近揾野食，係日本是但一間食店d野食都好味，有時仲會有驚喜，唔會有雷品， 絕對放心！

間拉麵店位於車站同大丸之間既横巷入面，門面相當唔起眼， 但見入面好多日本人食緊， 實冇問題啦， 於是入去幫親！

       

濃濃的醬油湯底，配上軟林林燒肉！ 

食完就出發，由阪急線梅田站搭特急去茨木，大概需要半小時 (係日本搭車要㨂特急，急行呢d,  可以skip 好多站，如果唔係站站停，有排搭).

去到茨木站，出面有個巴士站，有架循環線巴士去教堂，開頭都有小小難揾，因為冇乜指示， 巴士司機見我地個樣迷迷茫，加上去得茨木市既遊客多數都係去參觀'光之教堂',就主動上前問我係咪去Ando San教堂，並教我地坐邊架車，仲有幾耐有車， 雖然言語不太通(佢地用好簡單既英文對答) ， 但佢地都好主動幫忙，好窩心！去到'春日丘公園'站落車， 雖然有指示牌指示教堂位置，但都唔算太清楚， 呢刻有個日本伯伯好主動上前教我地點行過去，關西人真係熱情好客呢！

教堂位於寧靜的住宅區內，外牆用上安藤先生喜用的招牌物料混凝土，只掛上一個細細的十字架及一個用清玻璃做的十字架， 非常簡潔modern,睇唔出係教堂，但又同周圍環境出奇地配合。 

內庭亦是用混凝土所建，create 左各方面空間感既平衡！ 

 

2015 大阪+京都+白濱 - Day 1

老公係公司AD抽中一張來回日本機票, 無錯, 係一張! 老公當然唔會扔下我自己一個去咁衰仔, 就咁開始plan我地既"人地出豉油,我地出雞"的大阪賞櫻之旅! 2013年去過一次京阪神, 所以今次plan去未去過的地方.

老公公司係日資公司, 張機票當然係支持自己友- ANA! 雖則坐過ANA機都知道佢地d時間係夜機去早機返的, 但全機乘客90%係日本人, 比本土航空公司的多了一份寧靜及禮貌! 再者佢地既l飛機餐係冷麵+咖哩吉列豬, 總叫有點新鮮感!

已經開始日落了!

我地去既時間, 地點非常方便的心齋橋同梅田既酒店唔知咩事全部full 晒 (可能係賞櫻時間吧!), 簡直難以置信! 得番2千幾蚊晚的, 但我地又未至於咁富貴, 最後係hotels combine搵到間, 位於比較陌生的地方肥後橋 - APA hotel, "四つ橋線"上同西梅田一站之隔, 而且酒店位於車站隔離, 一分鐘路程就可以穿過樓梯到達車站入閘處, 尚算方便. 至於環境都算乾淨, 入住的大多是穿西裝的上班族, 而房size一貫日本酒店style - 細! 行李箱是不可以盡開的. (肥後橋這名字, 莫名的覺得有點搞笑!)

 


放下行李, 即刻趕去心齋橋食每次的指定動作 - 燒墨魚丸
香港的"銀座"墨魚丸早已消聲匿跡, 令人懷念! 去到大阪當然要食盡佢!
心齋橋的燒墨魚丸店有好多間, 各有自己的賣點 (除左醬汁, 基本上餡係差唔多的!). 今次食的是位於"蟹道樂"隔離, 24小時串燒對面的一檔. 大阪人比東京人熱情, 店員會問你係邊度黎, 閒談一番, 盡管燒墨魚丸燒到大汗淋漓, 但臉上仍掛著笑容和 - 禮貌 (係香港已漸漸被淡忘)

 

食一間唔夠滿足, 要食兩間! 另一間則位於道頓堀川上, "一蘭"隔離

 

我的至愛,抹茶控的天堂 - 川善茶居Sinmei Tea

暫時於香港唯一一間令我有衝動去完再去, 經常都念念不忘心思思想去食, 以抹茶為主打的食店 - 川善茶居, 簡直是抹茶控的天堂, 我的至愛!

川善位於上環商業大廈內的樓上鋪, 不太易找. 起初還以為以抹茶為主的店會以日式作為裝潢, 殊知步出電梯打開玻璃門, 竟是古色古香的中國風! 深木色屏風, 紅色的牆身配紅酸枝椅桌, 木雕花拱形層架上放置各式各樣茶餅, 茶葉及茶具, 琳瑯滿目, 很中式茗茶茶室. 而且全店更彌漫著濃濃的抹茶烤焗香味, 令人食指大動!

 

雖然Menu上的選擇不是太多, 但抹茶控的我當然想全部都試啦! (好貪心啊!)

先是鹹點 - Tea Club Sandwiches 

烘過的麥包加上蛋, 蕃茄,菜及素火腿, 無肉的三文冶, 感覺相當清新健康, 但對於我這食肉獸, 心靈上總有點空虛吧!

緊接是飲品 -  

Matcha Soul (凍)(左)

抹茶+豆奶+杏仁片+蜜糖+桂花, 一般都是用牛奶, 而川善則是用豆奶, 味道反而出奇的恰配, 淡淡的不會過甜

Matcha Latte (熱)(右)

比起咖啡連鎖店的來得好飲好多, 不單有濃厚的抹茶味而又不會過甜, 味道恰到好處. 只是份量

不多, 要珍惜地品嚐, 難以滿足

Hot Matcha Chocolate (熱)(中下)

抹茶+白朱古力, 嗜甜的我又怎會說一般呢? 好味到不得之了! 雖然其他女生都說偏甜, 但我已豁出去!

來自高雄的抹茶甜品店- 御前上茶

又是抹茶控出動的時候 - 
每當有新食店準備開張時, 各大媒體都會爭相報導, 無孔不入, 想唔知都好難! 亦因為如此鋪天蓋地式宣傳而導致每間食店新開張期間都門庭若市, 排晒長龍! "排隊" - 已經成為每次食新野的指定動作!

今次要試的是來自高雄的抹茶甜品店- 御前上茶
由本地薑GUM "JENG"合作開設的台灣過江龍 - 御前上茶, 選擇於旺角廣華街定位. 從前到廣華街只會逛槍店, 買氣槍用品 (跟老公是玩war game而認識的, 真令人懷緬!) 現在廣華街多開了食店, 人流亦多了很多.

是夜於廣華街附近吃過晚飯後, 便去擰籌, 心諗9點鐘應該好多人食完晚飯後食甜品而要大排長龍的! 怎料無想像中多人, 等了10分鐘已可入座, 是我們太早吃完晚飯? 還是這間熱潮已減退 (不會吧!!?)?

除了堂食, 店外還設有外賣部, 可以買走食, 不用排隊. 而店內裝潢非常簡單, 淺木色椅桌及圍身, 再加幾塊日式紮染掛布及用"繪馬"做的feature wall, 但因為椅桌放得比較密, 令到空間狹窄, 可能是為了應付貴租吧!

因為menu 上的選擇不是太多種類, 很多都很類似, 所以很快便有定案:

抹茶聖代
抹茶軟雪榚+抹茶啫喱+白玉丸子+脆米+豆腐+紅豆蓉, 每層材料都分明, 抹茶雪榚味道比較奶一點,不是太有茶味, 而且快溶要趕快吃, 豆腐很滑, 其他內容就普普通通, 整體都算是好味

抹茶鬆餅配雙色霜淇淋
抹茶鬆餅很香濃抹茶味,很鬆脆很可口, 單獨食都好好味, 暖暖的鬆餅配以紅豆蓉和寒天跟冰凍的雪糕食一起食, 又是另一番味蕾上的滋味. 雪糕是抹茶味跟焙茶味的混合, 焙茶味反而比抹茶更有茶的甘香更濃郁. 不過好多女生朋友都不是太喜歡焙茶的味道, 說它比較苦和味道怪怪的, 

價錢方面 - 今時今日於香港食好味的甜品, 等如食鋪租人工, 一般都需要這個價位. 相比起集團式經營的, 及名氣大一點, 地段好一點的, 已經算是平易近人了. 

潮食京都老字號抹茶甜品店香港分店 - "中村藤吉"

京都出產既抹茶非常有名, 而係京都其中一間出名食抹茶甜品既老字號店 - "中村藤吉", 竟然衝出日本, 選擇左黎香港開設分店! 身為抹茶控既我又點會錯過呢! (另外一間極受我寵愛既京都"茶寮都路里", 之後再寫!)

第一次光顧 - 不成功!
同一班抹茶控既女生gathering 梗係要去試下, 星期日2pm 去到擰籌 - 260號, 當時叫號只去到90號, 心諗:有冇咁多人食呀!!多渴望想食的我們都唯有放棄, 轉投樓下的Dazzling 懷抱!

第二次光顧 - 挑戰忍耐力!
老公星期五下午放假陪我去食, 吸收左第一次既失敗經驗, 去之前已經做足功課! 間鋪11am 開, 網友話10am已經有人係樓下lift lobby排隊, 11am去到都要等2個多小時方可入座. 原定11:15am 去到, 預計兩點前應該可以有得食, 但係我竟然唔生性11:49am先去到, 而且計漏左The One 既lift 係要等好耐......最後擰籌103號, 當時只叫到25號! 肯定有排等, 唯有去行一陣街睇下野先. 值得一讚既係佢地擰籌之餘, 仲可以用QR Code check 住叫到幾多號, 唔怕miss 左!

一個小時過去了, 都只係叫到53號, 等了又等......等到老公都放工黎到1:30pm,都只係叫到63號, 唯有坐係門口等. 我同老公都唔係有耐性既人, 竟然為左食抹茶甜品, 而極度挑戰自己既忍耐力,等幾個鐘, 為左食真係可以去到好盡 (有時..哈哈!) 最後等到3pm, 終於叫到我地啦!!

入到去職業病又發作, 先睇裝潢: 全落地玻璃窗, 加上天氣好好, 維港景一覽無遺! 店內全無間格, 樓底高加上自然光, 空間感非常開揚! 全店貫徹京都總店走日系簡約zen style, 以淺木色為主調. 沿窗邊放置2-4人檯, 而中間放置一張大檯 (對香港飲食文化, 同顧客以女生為主, 大檯難免不太合適吧!) 另一邊是學茶道的platform及"手信區".

我地安排坐係中間大檯, 安坐後waitress 即刻遞上熱茶及溫馨提示個茶壺好重好熱要小心! 等左咁耐而且等到餓,當然要叫盡佢! 

首先 - 腐皮抹茶烏冬定食
塊腐皮好甜,好入味, 抹茶烏冬軟硬度適中, 湯底係淡淡的醬油味, 整體配合得好好. 漬物淮山鹹度適中而且爽脆, 送紫菜碎珍珠飯一流! 澱粉質+澱粉質果然係關西style, 雖然無肉, 但都好滿足! 隨定食附有甜品 - 紅豆蓉+白玉丸子伴抹茶啫喱, 啫喱好香抹茶味, 帶點抹茶的甘澀配甜甜的紅豆蓉, 真係天衣無縫!

之後當然係甜品主角 - 生茶啫喱(抹茶)
一見到"每日京都空運抵港, 數量限定"既字眼, 二話不說即刻order! 跟定食既甜品差不多, 但多了兩球抹茶雪糕, 雪糕很幼滑又具茶香, 白玉丸子沾上抹茶雪糕食, 舌尖很滿足!

緊接 - 抹茶芭菲
從上而下, 忌簾, 抹茶蛋糕, 脆米,白玉丸子, 甜栗子, 紅豆蓉, 抹茶啫喱, 最底係抹茶雪糕, 各有風味, 混在一起吃又另一番口感, 令人感動又回味!! 雖然接近飽的狀態, 但一諗起等左咁耐, 而且短期內唔會再挑戰自己忍耐力, 決定再叫多個甜品, 係"宇冶金時餡蜜"同"京之精選"之間周旋左一陣,最後決定encore抹茶芭菲!

食好野真係要付出! 整體好味, 但要等咁耐先有得食, 寧願等無咁多人排時再去!

後話: "中村藤吉" vs "茶寮都路里", 一個係傳統抹茶甘澀味, 另一個側是新派抹茶香甜味, 兩個都鐘意!!